جواب
زیر بحث مسئلے کی دو شقیں ہیں : ایک باپ کا حق ولایت، دوسری نقل ِ مکانی کی صورت میں مستحق حضانت کا حق باقی رہنا یا ختم ہوجانا۔
زوجین کی کسی وجہ سے علاحدگی ہوجائے اور ان کے درمیان ایک بچہ ہو تو باپ کا حق ولایت ہر حال میں قائم رہتا ہے، چاہے بچہ کسی کی بھی پرورش میں ہو۔ ولایت میں اس سے ملنا جلنا، اس کی دیکھ بھال اور خبر گیری کرنا، اس کی تعلیم و تربیت کا انتظام کرنا اور اس کی کفالت کرنا سب چیزیں شامل ہیں ۔ اس پر تمام فقہاء کا اتفاق ہے اور یہ چیز اسلام کے نظامِ خاندان کے عین مطابق ہے۔
بچہ ماں کی پرورش میں ہو اور ماں اس شہر سے جہاں بچے کا باپ رہتا ہے، کسی دوسرے شہر میں منتقل ہوجائے تو اس کا حق حضانت باقی رہتا ہے یا نہیں ؟ اس کی تفصیلات و جزئیات میں فقہا کا اختلاف ہے۔ یہ اختلاف اس بات پر مبنی ہے کہ ماں کے نقل مکانی کی صورت میں باپ ولایت کی ذمہ داری ادا کر پائے گا یا نہیں ؟ جن فقہاء کے نزدیک اس صورت میں باپ فرائض ولایت کی انجام دہی سے قاصر رہے گا وہ ماں کا حق ِ حضانت ساقط قرار دیتے ہیں اور جو فقہا سمجھتے ہیں کہ اس صورت میں بھی باپ بچے کی خبر گیری اور کفالت کرسکتا ہے وہ ماں کا حق حضانت باقی رکھتے ہیں ۔
فقہائے ثلاثہ (امام مالکؒ، امام شافعیؒ اور امام احمدؒ) کہتے ہیں کہ اگر ماں دوسرے شہر منتقل ہوجائے تو حق حضانت باپ کو حاصل ہوجائے گا، تاکہ وہ بچے کی تربیت، تادیب اور تعلیم کا نظم کرسکے۔ قاضی شریح نے ایک موقع پر یہی فیصلہ کیا تھا۔ امام احمدؒ سے ایک دوسری روایت یہ ہے کہ اس صورت میں بھی ماں کو حق ِ حضانت حاصل رہے گا۔
امام ابو حنیفہؒ فرماتے ہیں کہ اگر ماں اپنے وطن (جہاں رہتے ہوئے اس کا نکاح ہوا تھا) منتقل ہوئی ہو تو اس کا حق حضانت باقی رہے گا اور اگر اس کا نقل مکانی کہیں اور ہوا ہو تو یہ حق باپ کی طرف منتقل ہوجائے گا۔ امام ابو حنیفہؒ سے ایک دوسری روایت یہ منقول ہے کہ اگر ماں شہر سے منتقل ہوکر گاؤں میں جا رہی ہے تو حق حضانت باپ کو حاصل ہوجائے گا، لیکن اگر وہ ایک شہر سے دوسرے شہر منتقل ہو رہی ہے تو اس کا استحقاق باقی رہے گا۔
فقہاے کرام کی یہ آراء اپنے زمانے کے اعتبار سے ہیں ۔ پہلے سفر میں بہت دشواریاں تھیں ۔ راستے پر خطر رہتے تھے، ذرائع نقل و حمل محدود تھے، ایک جگہ سے دوسری جگہ اگر دور ہو تو وہاں پہنچنا بہت زحمت طلب ہوتا تھا اور کافی وقت بھی لگتا تھا۔ اس لیے انھوں نے یہ راے دی کہ ماں کے دوسرے جگہ منتقل ہوجانے کی صورت میں اس کا حق حضانت ساقط ہوجائے گا۔ کیوں کہ اس صورت میں حق ولایت سے باپ کی محرومی لازم آتی تھی۔ لیکن اب حالات بدل گئے ہیں ۔ راستے پر امن ہیں اور دور دراز مقامات تک بھی بہ آسانی اور کم سے کم وقت میں پہنچا جاسکتا ہے۔ فقہ کا اصول ہے کہ زمانہ اور حالات بدلنے سے احکام بھی بدل جاتے ہیں ۔ اس لیے آج کے دور میں محض نقل مکانی کو ماں کے استحقاق حضانت سے محرومی کی بنیاد بنانا درست نہیں معلوم ہوتا۔
عصر حاضر میں عالم اسلام کے مشہور فقیہ سید سابق نے اپنی مایہ ناز تصنیف ’فقہ السنۃ‘ میں فقہاے کرام کے مذکورہ بالا اقوال نقل کرنے کے بعد لکھا ہے:
’’یہ تمام اقوال، جیسا کہ آپ دیکھ رہے ہیں ، کسی ایسی دلیل پر مبنی نہیں ہیں جس پر دل مطمئن ہوجائے۔ صحیح بات یہ ہے کہ بچے کے ماں باپ میں سے کوئی دوسری جگہ منتقل ہورہا ہو تو یہ دیکھا جائے گا کہ بچے کا ان میں سے کس کے پاس رہنا اس کے حق میں بہتر اور زیادہ فائدہ مند ہے۔ بچے کا فائدہ، اس کی نگرانی اور حفاظت ماں باپ میں سے جس کے پاس زیادہ ہو اسی کے پاس بچے کو رکھا جائے گا۔ اس معاملے میں منتقلی یا عدم منتقلی کا کوئی اعتبار نہ ہوگا۔
(فقہ السنۃ، دار الکتاب العربی، بیروت ۱۹۸۳ء، ۲/۳۵۲)