مجذوب کا انکار

 افسوس یہ ہے کہ مسلمانوں کی اکثریت علم دین سے ناآشنا ہے اور جاہلوں کو شکار کرنے والے شیاطین جن وانس ہرطرف پھیلے پڑے ہیں۔ آپ کے سوالات کے مختصر جوابات یہ ہیں 

(۱) یہ بات بالکل غلط ہے کہ مجذوب کا انکار کرنے والا کافر ہے۔انسانوں کے گروہ میں صرف خدا کے پیغمبروں کا انکارکفر ہے اور سیدنا محمد رسول اللہﷺ کے بعد کوئی نبی قیامت تک آنے والا نہیں ہے۔ آپ اللہ کے آخری نبی ورسول ہیں۔ یاد رکھیے کہ جس شخص پرایمان لانا ضروری ہے، اسی کا انکار کفر ہے اور جس پر ایمان لانا واجب نہیں اس کا انکار کفر نہیں ہے۔

(۲) مجھے نہیں معلوم کہ وہ چوٹی کے مشائخ اور علماء دین کو ن ہیں جن کی طرف آپ نے یہ باتیں منسوب کی ہیں۔ میراخیال ہے کہ یہ باتیں بھی کسی دغا باز نے علماء ومشائخ کانام لے کر آپ سے کہی ہیں۔ مجذوب اگر پاگل ہوتا ہے توبلاشبہ وہ غیرمکلف ہے۔ لیکن مجذوب اگردیوانہ نہیں ہوتا تو اس کے لیے نماز روزہ معاف نہیں ہے۔ مجذوبوں کی بات لوگوں نے اتنی پھیلائی ہے کہ بہت سے جاہل مسلمان، پاگلوں کو بھی مجذوب ہی سمجھتے ہیں۔

(۳) ہرمسلمان کی دعا اوربددعا قبول ہوتی ہے اورہوسکتی ہے۔ اس کے لیے مجذوب ہونا شرط نہیں ہے۔ دعاکا قبول کرنے والا اللہ تعالیٰ ہے اور وہ اپنی حکمت ومصلحت سے فیصلے فرماتاہے۔

(فروری ۱۹۶۸ءج۴۰ ش۲)