انبیاء کی بعثت کامقصد

یہ بہت اچھا ہوا کہ آپ نے مجھے خدائے برحق کے سپرد کرکے اپنی حجت تمام کرلی کیوں کہ میں بھی آپ جیسے بزرگوں سے کسی بحث میں الجھنا پسند نہیں کرتا۔ اگر آپ یہ اشارہ نہ کرتے کہ اس سلسلے میں یہ آپ کا آخری خط ہے تو میں اسے شائع کرنے اور جواب دینے کی ہمت نہ کرتا۔ میں بھی اس سلسلے میں آخری طورپر آپ سے چند باتیں عرض کرکے یہ گفتگو ختم کررہاہوں۔

(۱) آپ نے اب اپنے ا س خط میں حدود وقصاص وجہاد کے مخصوص حالات میں فرض ہونے کی جو بات کہی ہے اور دین وشریعت کے فرق کی طرف جو توجہ دلائی ہے، راقم الحروف نے اپنی کتاب ’امت مسلمہ کا نصب العین‘میں تین عنوانات کے تحت اس پر بحث کی ہے۔ وہ تین عنوانات یہ ہیں   (۱) شریعتوں کے اختلاف کی نوعیت (۲) ہم پوری شریعت کے مخاطب ہیں (۳) دلیل شرعی کے بغیر کوئی مطلق حکم مقید نہیں ہوسکتا- لیکن آپ کے پاس اتنا وقت کہاں ہوگا کہ اسے پڑھنے کی زحمت گوارا کریں۔ اقامت دین کے نصب العین اور جماعت اسلامی پراعتراضات کرنے کے لیے میری کتاب کو ڈھال بنانے کی ضرورت نہیں تھی۔ یہ تکلف آپ نے بے کار کیا۔ میں نے وہ کتاب اسی طرح کے اعتراضات دفع کرنے کے لیے لکھی ہے۔ اب اگر کوئی شخص میرے دلائل کا جواب دیے بغیر وہی اعتراض دہرائے چلاجائے تو میرے بس میں یہ نہیں ہےکہ میں اس کو روک سکوں۔ یہ تومناسب نہیں کہ میں اپنی کتاب کے وہ تمام مباحث یہاں نقل کروں اس لیے اس سے ہٹ کر چند نکات پراکتفا کر رہاہوں۔

(الف) تمام امت اس پر متفق ہے کہ شریعت دین کاجزوہوتی ہے، اس سے خارج نہیں ہوتی۔ اقامت دین کے حکم میں اقامت شریعت بھی داخل ہے۔ مثال کے طورپر کوئی معقول آدمی یہ سوچ بھی نہیں سکتا کہاقیموا الدین  کے حکم سے اقامت صلوٰۃ  خارج ہےحالاں کہ نماز شریعت کی ایک فرد ہے۔

(ب) اللہ کی طرف سے نازل کردہ شریعتوں میں اختلاف محض جزوی رہاہے۔

(ج) ہرنبی ورسل اپنے وقت میں اس شریعت پرعمل اوراس کی اقامت کے مکلف تھے جو ان پر نازل ہوئی۔ آخر کس عقل سے یہ سوچا جاسکتا ہے کہ مثلاً حضرت عیسیٰ علیہ السلام صرف ان احکام کی اقامت کے مکلف نہ تھے جو ان پرنازل ہوئے بلکہ ان احکام کی اقامت کے مکلف بھی تھے جو پانچ سو برس بعد حضرت محمدؐ پر نازل ہونے والے تھے یا کس عقل میں یہ نکتہ سماسکتا ہے کہ سیدنا محمدﷺ صرف اتنی ہی بات کی اقامت کے مکلف تھے جو حضرت نوح وابراہیم موسیٰ وعیسیٰ علیہم السلام پرنازہوئی تھی اور جو باتیں خاص آپ پر نازل کی گئیں ان کی اقامت کے مکلف نہ تھے۔

(د) شریعت محمدی مکمل اور دائمی ہے جس میں قیامت تک کسی تبدیلی کی گنجائش نہیں۔ کیوں کہ اب کوئی نئی شریعت آنے والی نہیں ہے۔

(ہ) سیدنا محمدﷺ اس دین وشریعت کی اقامت کے مکلف تھے جو آپ پر نازل ہوئی اور اب امت محمدیہ قیامت تک اسی شریعت پرعمل اور اس کی اقامت کی مکلف ہے۔ شریعت محمدی کے بعد تمام سابق شریعتیں منسوخ ہوچکی ہیں الا یہ کہ شریعت محمدی نے ان میں سے کسی حکم کو باقی رکھاہو۔ ان مسلمات کے بعد فریضۂ اقامت دین کے ذیل میں اختلاف شرائع کی بحث چھیڑنا کیا معنی رکھتا ہے؟ اس کے بارے میں کم سے کم یہی کہا جاسکتا ہے کہ یہ بحث چھیڑنے والا مسلمان اس فریضے سے راہ فرار اختیار کرنے کے لیے اپنے کو اور دوسروں کو فریب میں مبتلا کررہاہے یا شریعت محمدی کو بھی غیرمتبدل تسلیم نہیں کرتا۔

(۲)فقہائے امت نے بھی صراحت کے ساتھ لکھا ہے اور جماعت اسلامی بھی بیسیوں بار کہہ چکی ہے کہ حکومت خود مقصد نہیں ہے بلکہ حصول مقصد کے لیے موقوف علیہ ہے۔ مقصد یہ ہے کہ قرآن کے تمام احکام وقوانین کی تنفیذ کی جائے۔ حدودوقصاص اوراس طرح کی بہت سے احکام کی تنفیذ حکومت کے بغیر ممکن نہیں ہے اس لیے موقوف علیہ ہونے کی حیثیت سے اسلامی حکومت کا قیام ضروری ہے۔ رہا یہ سوال کہ اس ذمہ داری سے عہدہ برآہونے کی صورت کیا ہے تو میں نے اس کا جواب اپنی کتاب کے آخری باب میں دیاہے جس کا عنوان ہی ہے’ذمہ داری سے عہدہ بر آہونے کی صورت۔‘ میری آپ سے بھی درخواست ہے اور ان تمام حضرات سے جو آپ کا خط پڑھیں گے کہ میری کتاب کے یہ حصے ضرور ملاحظہ کرلیں۔

(۳) آپ نے ’’انبیاکابنیادی فرض اوران کی ثانوی حیثیت ‘‘ کے تحت انبیاء کے اصل مقصد اورثانوی مقصد کی جو تقسیم کی ہے اس سے پہلے لکھا ہے کہ’’۱۹۴۳ء میں غایت اضطراب میں اس کا اشارہ ساپایا تھا آج اس کی تکمیل کر دیتاہوں۔ ‘‘

گویا اس تقسیم کی دلیل وحجت وہ اشارہ ہے جو آپ نے ۱۹۴۳ء میں پایاتھا۔ یہ ہے وہ اصل دلیل جو آپ جیسے بزرگوں کے پاس ہے۔ ظاہر ہے کہ ہمارے نزدیک اس طرح کے اشارات والہامات دین میں دلیل وحجت نہیں ہیں اس لیے ان مسائل میں ہمارے اور آپ کے درمیان گفتگو کی کوئی متفقہ بنیاد ہی موجود نہیں ہے۔ آپ اپنے الہامات پرعمل کریں اور ہم کتاب وسنت پر عمل کرنے کی کوشش کررہے ہیں - اس سے الگ ہٹ کر میں آپ ہی کے الفاظ میں آپ سے پوچھنا چاہتاہوں کہ ’سخن سازی کے فن سے ایک طرف ہوکر سادہ اور مومنانہ انداز پرجواب دیجیے‘ کہ انبیاء کرام کی بعثت کامقصد وہ تھا جو آپ نے اپنے پہلے خط میں (جو زندگی مارچ ۱۹۶۹ء میں شائع ہواہے) ظاہر کیاتھا یا یہ ہے جو آپ نے اپنے اس تازہ خط میں ظاہر کیا ہے؟ پہلے خط میں تو آپ نے متعدد آیتیں جمع کرکے صرف تبلیغ کو ’رسولوں کاقرآنی موقف‘ قراردیاتھااور مجھے متوجہ کیاتھا کہ ’’انما اور الا کے کلمہ حصر کو لگاتار ملاحظہ فرماتے جائیں، اسے نظر سے اوجھل نہ ہونے دیں۔ ‘‘

اور اس تازہ خط میں آپ نے انبیاء کا جو اصل مقصد لکھا ہے اس میں تطہیر قلوب بھی ہے، تزکیۂ نفوس بھی ہے، تکمیل ایمان واخلاق بھی ہے، فرد کی تمام روحانی واخلاقی صلاحیتوں کو بیدار کرنا بھی ہے اورپھر انھیں لاتعداد وصفات خدا داد سے مربوط کرنا بھی ہے- آپ کے دونوں خط پڑھنے والا حیران ہوگا کہ آپ کی کس بات کو صحیح سمجھے؟ افسوس ہے کہ آپ نے ۱۹۴۳ء میں جو اشارہ پایا تھا اس میں ذراسی کسر رہ گئی۔ اگر اس میں اتنا اورشامل ہوجاتاکہ ’انبیاء کرام کامقصد بعثت یہ بھی تھا کہ ان پر جو دین نازل کیاگیا ہے اس کو قائم اورباطل ادیان پراس کو غالب کریں ‘ توشاید ہم میں اورآپ میں اختلاف باقی نہ رہتا۔

(۴) ہم لوگ اللہ کے فضل وکرم سے صرف اس کی صفت حاکمیت ہی پر نہیں بلکہ اس کی تمام صفات پرایمان لائے ہیں، ان پر یقین رکھتے ہیں، ان کی تبلیغ کرتے ہیں اوران کے تقاضوں کو پورا کرنے کی کوشش کرتے ہیں۔ آپ کا جو جی چاہے سمجھتے رہیے، جواب آپ کو نہیں دینا ہے بلکہ اس کو دینا ہے جس پر ہم ایمان لائے ہیں۔ البتہ ہمیں اپنی عبادت وریاضت اور روحانیت پرکوئی غرہ نہیں ہے بلکہ ہم تو اپنے کسی ایک سجدے کو بھی اس بارگاہ عظمت وجلال کےلائق نہیں سمجھتے۔ اگروہ قبول کرے تو یہ محض اس کا کرم اوراس کا احسان ہے۔

(۵) جماعت سازی کو مطلقاً تفرقہ فی الدین قراردینا سوء فہم کا نتیجہ ہے۔ جماعت اسلامی متعدد بار کہہ چکی ہے کہ وہ اپنے کو ’الجماعۃ ‘ نہیں سمجھتی بلکہ فی الواقع امت مسلمہ کے موجودہ منتشرافراد کو ’الجماعۃ‘ بنانے کے لیے اس نے اپنی ایک تنظیم قائم کی ہے، جس دن وہ ’الجماعۃ‘ وجود میں آگئی اسی دن کسی علیحدہ تنظیم کی ضرورت ختم ہوجائے گی۔                         (مئی ۱۹۶۹ء ج ۴۲ ش۵)