تصوف کی اصطلاح

مئی ۱۹۸۴ء کی بات ہے کہ آل انڈیا ریڈیو اورنگ آباد دکن کے اردو پروگرام ’سب رنگ‘ کے لیے ’کتابوں کی باتیں ‘ کے تحت مجھے کسی کتاب پر ’ٹاک‘ لکھنے کی دعوت دی گئی تھی۔ میں نے اس تعارفی تبصرے کے لیے آپ کی کتاب ’اسلامی تصوف‘ کا انتخاب کیا۔ یہ ٹاک ۲۵؍مئی ۱۹۸۴ء کو نشر ہوئی تھی، لیکن ہمت نہ ہوتی تھی کہ آپ کی خدمت میں ارسال بھی کردوں کہ میں کیا اور میری رائے کیا۔ لیکن اب بھیجنے کی یہ جو جسارت کررہاہوں اس کا محرک ’غیراسلامی تصوف کامقدمہ‘ہے۔ کیوں کہ یہ کھٹک آپ کی کتاب ’اسلامی تصوف‘ پڑھتے ہوئے بھی محسوس کی تھی جو دیگر کتابوں خصوصاً حضرت مولانا علی ندوی کی کتاب ’تاریخ دعوت وعزیمت ‘ حصہ اول کے مطالعہ کے بعد کچھ بڑھ گئی تھی اور اب ’غیراسلامی تصوف‘ کامقدمہ پڑھ کر اس میں مزید اضافہ ہوگیا کہ سارا جھگڑا اسلامی اصطلاح ’احسان‘ کو چھوڑکر ’تصوف ‘ کی اصطلاح استعمال کرنے کی وجہ سے کھڑا ہواہے۔یہی خرابی کی جڑ ہے۔ نہ اسلامی اصطلاح کو چھوڑ ا جاتا نہ غیراسلامی تصورات، نظریات، طریقوں اور رویوں کو یوں در آنے کا آسان موقع ملتا۔ آپ نے فرمایا ہے کہ ’اصطلاح پر جھگڑنا معقول بات نہیں ہے۔‘ لیکن ہم دیکھ رہے ہیں کہ جھگڑا تو خود اس اصطلاح ’تصوف‘ کا پیدا کردہ ہے۔ آخراسلامی اصطلاحات ’تقویٰ‘ اور ’احسان‘ کو چھوڑ کر دوسری اصطلاح استعمال کرنے کی ضرورت ہی کیوں پڑی جب کہ یہ لفظ ایسا ہے کہ اس کی اصل کا صحیح سراغ آج تک نہیں لگایا جاسکا۔ میرے ناچیز خیال میں اس اصطلاح کا استعمال ہی بذات خود غیراسلامی اثرات کاغماز ہے۔ شیطان اللہ کے سیدھے راستے پربیٹھ کر ہی تودھوکا دیتا ہے۔ معاشرتی زندگی میں مخصوص اصطلاحات بالعموم ایک خاص انداز کی ذہنی افتاد، فکری مزاج اور عملی رویے کی علامت ہوتی ہیں۔ انھیں معمولی سمجھ کر نظرانداز کردینا زبردست غلط فہمیوں اور نقصانات کاسبب بن سکتا ہے او ربنتا رہاہے۔ اسی لیے اس ہیچ مداں کی عرض یہ ہے کہ اس اصطلاح ’تصوف ‘ سے چھٹکارا حاصل کرلینے ہی میں عافیت ہے۔

اپنی اس نامعقولیت اورگستاخی کے باوجود یقین رکھتا ہوں کہ آپ عفوو درگزرسے کام لیتے ہوئے احسان کی روش اختیار فرمائیں گے اور مجھے تسلی بخش جواب سے نوازیں گے۔