جوئے کی ایک شکل

حسب ذیل کاروبار کا شرعی حیثیت سے جواز ہے یا نہیں ؟ آپ کی گراں قدر رہ نمائی مطلوب ہے

زید ایک مشین جس کی قیمت بازار میں ساٹھ روپے ہے۔ اس مشین کا کاروبار اس طرح کرتا ہے کہ ساٹھ آدمیوں سے دس دس روپے کی ایک قسط پہلے مہینے میں وصول کرتا ہے اورساٹھ آدمیوں کے درمیان قرعہ اندازی کرکے جس کے نام قرعہ نکلے اس کو ایک قسط پر ہی مشین دے دیتا ہے۔ دوسرے مہینے بقیہ لوگوں سے دس دس روپے کی ایک اور قسط وصول کی جاتی ہے اورپھر ان لوگوں میں قرعہ اندازی کرکے جس کے نام قرعہ نکلے اسے دوسری قسط پرہی مشین دے دی جاتی ہے۔ اس طرح پانچ مہینوں تک قرعہ اندازی سے ایک ایک آدمی کو مشین ملتی رہتی ہے اور چھٹے مہینے میں بچے ہوئے تمام لوگوں کو زید ساٹھ روپے فی مشین کے حساب سے بالاقساط رقم جمع ہوجانے پر مشین دےدیتا ہے۔ اس کاروبار کے سلسلے میں زید کا استدلال یہ ہے کہ چھ مہینے تک دس دس روپے بالا قساط جمع ہونے پربازار کے نرخ کے مطابق واجبی دام پر مشین مہیا کردی جاتی ہے۔ بلکہ بازار کے اس وقت کے دام سے کچھ کفایت کے ساتھ ہی تمام ممبروں کو مشین مل جاتی ہے۔ ممبروں سے اصل قیمت کے علاوہ کچھ بھی زائد نہیں لیا جاتا۔اس لیے اس میں سودکا تو کوئی شائبہ بھی نہیں ہے۔ نیز کسی ممبر کو کچھ بھی نقصان نہیں ہوتا۔ان کی جمع کی ہوئی رقم کی مالیت کا پورا مال ان کو مل جاتا ہے اس لیے اس میں جوئے کی بھی کوئی شکل موجود نہیں ہے۔پہلے پانچ آدمیوں کو بالترتیب مشین دے دینے کی وجہ سے زید کو جو نقصان ہوتا ہے اس کا کہنا ہے کہ اس پورے کا روبار پر جو نفع ملتا ہے اس میں وہ ادا کرتاہے۔ اس نوعیت کا کاروبار جائز ہے یا نہیں۔ مطلع فرماکر ممنون فرمائیں، تاکہ اس میں عدم جواز کی کوئی شکل ہوتو اس سے دامن بچاسکیں۔