لفظ ’اتباع‘ کاترجمہ

تبصرہ نگار کامصنف کی تمام باتوں سےمتفق ہونا ضروری نہیں ہے اورنہ کسی مصنف کاکسی کے تبصرے سے متفق ہونا ضروری ہے۔ لیکن فاضل مصنف نے اپنے خط کے آخرمیں یہ جولکھا ہے کہ ’اتباع ‘ کاترجمہ ’پیچھا کرنا‘ بہرحال غلط ہے۔ اگر اپنی مرضی سے مطابق عربی الفاظ کے معنوں میں یہ تحریف روا رکھی گئی تو قرآن حکیم کی بہت سی آیتوں کامفہوم بدل جائے گا۔

انھی آخری جملوں کی وجہ سے میں نے ان کو ایک خط بھیجا تھا کہ آپ کا خط اپنے جواب کے ساتھ میں شائع کروں گا او ریہ مخلصانہ مشورہ بھی دیا تھا کہ دارالعلوم ندوۃ العلماء کے دوعلماء مولانا مفتی محمد ظہورندوی اورمولانا برہان الدین سنبھلی صاحبان سے وہ مشورہ کرلیں کہ فقہی عبارت کے جس مقام پر ترجمہ کو میں نے غلط کہا ہے وہ صحیح ہے یا غلط ؟ مجھے معلوم نہیں کہ میرا ارسال کردہ پوسٹ کارڈان کوملایا نہیں۔ میں اب اپنا وعدہ پورا کررہاہوں۔ میں نے اپنے تبصرے میں لکھا تھا کہ مقالات شبلی جلد اول میرے سامنے نہیں ہے۔ مصنف کاخط آنے کے بعد ایک لائبریری میں جاکر مولانا شبلی کے اس مقالے کو پڑھنا پڑا۔ مصنف کا حوالہ صحیح ہے اور اب یقین کے ساتھ لکھنا پڑرہاہے کہ مولانا شبلی کاترجمہ واقعی حیرت انگیز ہے۔ انھوں نے غلط ترجمہ کیوں کیا تھا اس پر قیاس سے کچھ کہنا مناسب نہیں ہے۔ دوسری بات یہ کہ شخصیت پرستی حرام، لیکن فرق مراتب ضروری ہے۔ مصنف نے اس پر اعتراض کیا ہے شاید وہ فرق مراتب کے قائل نہیں ہیں۔

تیسری بات یہ کہ میں نے ان کی کتاب کے باب ششم کوکیوں ’بے جوڑ‘ لکھا اس کی وجہ بھی لکھی تھی۔ چوتھی بات یہ کہ اتباع کاترجمہ ’پیچھا کرنا‘ نہ غلط ہے اور نہ تحریف۔ میں بہت اختصار کے ساتھ اس کے بارے میں چند باتیں عرض کرتاہوں۔

یہ بات ہرپڑھے لکھےشخص کومعلوم ہوگی کہ شرعی اصطلاحیں لغوی معنی ہی کے لحاظ سے بنی ہیں۔ لیکن معلوم نہیں یہ غلط فہمی کس طرح پیداہوگئی ہے کہ اصطلاح بن جانے کے بعد اس کا لغوی معنی غیرمستعمل ہوجاتاہے۔ یہ غلط فہمی اونچے درجے کے اہل علم میں بھی پائی جاتی ہے۔ لفظ ’بدعت ‘ کے بارے میں ایک سوال کے جواب میں زندگی اپریل ۱۹۸۱ء کے رسائل ومسائل میں تفصیل سے اس پر اظہار خیال کیاتھا اور قرآن کریم کی آیات پیش کرکے بتایا تھا کہ کوئی اصطلاح مقرر ہوجانے کے بعد بھی قرآن کریم میں اس کے لغوی معنیٰ کے لحاظ سے بھی اس کے استعمالات موجود ہیں۔ یہاں اس کی پوری تفصیل دہرائی نہیں جاسکتی۔ صرف ایک لفظ ’حدیث‘ کوسامنے رکھ لیا جائے تو کافی ہے۔ اس کے ایک اصطلاحی معنی ہیں اورایک لغوی معنی، لغوی معنی ہی کے لحاظ سے خو دقرآن کریم کو،قرآن میں بھی اور احادیث میں بھی ’حدیث‘ کہاگیا ہے۔ آج اسی غلط فہمی کی بناپرلفظ ’اتباع ‘ پراظہار خیال کرنا پڑ رہا ہے۔لفظ اتباع ’تبع‘ کےمادے سے بناہے۔ تبع کے لغوی معنی کسی کے پیچھے چلنے کےہیں۔ یا پہلے سے گئے ہوئے شخص یا اشخاص سے بعد کو جاکر مل جانے کے ہیں۔ ’تبع ‘ کا لفظ متعدد ابواب میں استعمال ہوتاہے۔ ان میں سے دوباب- باب افتعال اورباب افعال ہیں، باب افتعال سے اتّباع بناہے اورباب افعال سے اتباع۔ لغوی معنی کے لحاظ سے قاموس میں اس کے وہی معنی دیے ہیں جو تبع کے ہیں۔ قاموس میں ہے۔ الا تباع والاتباع کالتبع۔

اسی لغوی معنی ’پیچھے چلنے‘ کے لحاظ سے اللہ ورسولؐ کی اطاعت اور فرماں برداری کی اصطلاح بنی ہے۔ لیکن اس کے لغوی معنی غیرمستعمل نہیں ہوئے ہیں بلکہ قرآن میں یہ دونوں، اتباع اوراتباع لغوی معنی میں بھی استعمال کیے گئے ہیں۔ مثلاً حضر ت لوط علیہ السلام کو جب اپنے مومنوں کے ساتھ بستی سے نکل جانے کا حکم دیاگیا تو یہ حکم بھی دیاگیا اَتَّبِعْ اَدْبَارَھُمْ (الحجر۶۵) اس کا ترجمہ شاہ عبدالقادر اور شیخ الہند رحمہما اللہ نے یہ کیا ہے ’’اور توچل ان کے پیچھے۔ ‘‘ظاہر ہے کہ یہ لفظ اپنے لغوی معنی میں استعمال ہواہے، اطاعت اورفرماں برداری کے معنی میں استعمال نہیں ہواہے۔ اسی طرح لفظ اتباع پیچھے چلنے اور پیچھا کرنےکے معنی میں بھی استعمال ہواہے۔ مثلاً فَاَتْبَعَھُمْ فِرْعَوْنُ وَجُنُوْدُہٗ (یونس۹۰) اس کا ترجمہ شاہ عبدالقادر اور شیخ الہندؒ نے یہ کیا ہے’’پھر پیچھا کیا فرعون اوراس کے لشکر نے۔‘‘

زیر بحث فقہی عبارت میں بھی لفظ اتباع قطعی طورپر لغوی ہی معنی میں استعمال ہواہے۔ اس عبارت میں اس کا ترجمہ اطاعت کرنا ایک ایسی غلطی ہے جس کی توجیہ مشکل ہے۔ تحریف میں نے نہیں کی ہے بلکہ اس شخص نے کی ہے جس نے فقہ کی اس عبارت میں اتباع کا ترجمہ ’’ اور ہم پران کی اطاعت فرض ہوگی‘‘ کیا ہے۔ میں نے فقہ کے اس مقام کی ایک مختصر توضیح بھی کی تھی لیکن شاید مصنف نے اس کی طرف توجہ ضروری نہیں سمجھی۔ آخر میں مصنف کو مخلصانہ مشورہ دیتا ہوں کہ وہ کسی مستند اورمعتمد علیہ عالم مفتی سے فقہ کے اس مقام کوسمجھ لیں۔                                       (مئی ۱۹۸۵ء ج۲ش۵)