ملعون شاعری

قومی آواز نئی دہلی کے ۱۰؍نومبر ۱۹۸۵ء کے شمارے میں نئی ہندی شاعری سے ترجمہ کرکے ’خدا‘ کے عنوان پرایک نظم ایک مسلمان صاحب نے شائع کرائی۔ اس پراس اخبار میں مراسلات کا سلسلہ شروع ہوا۔ اس نظم کی حمایت میں ۲۷؍نومبر کے شمارے میں ایک غیرمسلم چند ر بھان خیالؔ کا مراسلہ شائع ہوا جس میں انھوں نے لکھا کہ خدا کے بارے میں جن اشعار پراعتراضات کیے جارہے ہیں ان پر تعجب کیوں کر ؟ پڑوسی ملک پاکستان کے مسلمان شعرا نے بھی اس طرح کے اشعار کہے ہیں اور اس اسلامی ملک میں وہ شعرا اچھے مناصب پر فائز تھے اور ہیں۔ پھر انھوں نے نمونے کے طورپر یہ اشعار نقل کیے ہیں، میں ’’نقل کفر،کفر نباشد‘‘ کے طورپر ذیل میں نقل کرتاہوں 

یہ شہنائیاں سن رہی ہو؟

نہیں اس دریچہ سے باہر توجھانکو

خدا کا جنازہ لیے جارہے ہیں فرشتے

                                                      (ن،م،راشد)

تیرا خدا جدا ہے

میرا خدا جدا ہے

اس کاخدا جدا ہے

میرے لیے تو یارو

لڑکی کا خوب صورت

ننگا بدن خدا ہے

                                                      (زاہد ڈار)

آمٹا دیں یہ تفاوت یہ جمود

آکہ ہوپھر کسی عیسیٰ کا ورود

تو بھی مظلوم ہے مریم کی

طرح میں بھی تنہا ہوں خدا کی مانند

                                                      (حمایت علی شاعر)

انھیں الفاظ میں مدفون ہیں شاہوں کے ضمیر

انھیں الفاظ میں ملفوف ہے مذہب کا خدا

                                                      (یوسف ظفر)

آپ سے سوال یہ ہے کہ کیا اس طرح کی شاعری کا تعلق عقیدے سے نہیں ہوتا؟ کیا یہ سب محض شاعری ہے؟ اوراس طرح کے شعرا کاحکم کیاہے؟