کیا دنیوی علوم کی تحصیل ناجائز ہے؟

 میرے جس نوٹ کا آپ نے حوالہ دیاہے اسے آپ پھر پڑھیں اور نقطے لگاکر جس عبارت کو آپ نے اپنے خط میں حذف کردیا ہے اسے بھی ملاحظہ کریں میرے نوٹ میں اسی کو خاص اہمیت حاصل ہے۔ اس کے علاوہ آپ پھر اس مقام کا بھی مطالعہ کریں جہاں یہ نوٹ لگایا گیاہے۔ حضرت مجدد کی وہ بات وہیں ختم ہوتی ہے جہاں نوٹ لگایاگیا ہے ۔’’ورنہ ان کا اشتغال جائز نہیں ہے‘‘ کے بعد کی عبارت بطوردلیل پیش کی گئی ہے اس لیے ظاہر ہے کہ نوٹ اس دلیل کے بعد ہی لکھنا چاہیے تھا۔

اس سوال کے بعد اب آپ کے سوالات کے مختصر جواب لکھتا ہوں لیکن سب سے پہلی بات تو مجھے یہ لکھنی ہے کہ اسلامی نظریۂ تعلیم چوں کہ آپ کی نگاہوں سے اوجھل رہااس لیے وہ سوالات آپ کے ذہن میں ابھرے۔ میرا خیال ہے کہ اسلامی نظریۂ تعلیم اگر آپ کے سامنے ہوتا تو یہ سوالات نہ ابھرتے یا پھر آپ انھیں خود حل کرلیتے۔ یہ نظریہ کیا ہے؟ اس کی تفصیلات طویل ہیں ۔ اس کے بجائے کہ میں انھیں لکھوں، میرامشورہ ہے کہ آپ جماعت اسلامی کے لٹریچر کی کتاب ’تعلیمات‘ مطالعہ کرلیں، اس کتاب میں اسلامی نظریۂ تعلیم کی بنیادی تفصیلات موجود ہیں ۔ اصل الجھن جو پیداہوتی ہے وہ دینی اور دنیاوی علوم کی الگ الگ تقسیم کی وجہ سے پیداہوتی ہے، خلافت راشدہ کے بعد جب مسلم معاشرے میں طرح طرح کی خرابیوں نے سراٹھایا تو انھیں میں کی ایک بڑی خرابی یہ تھی کہ علوم کو بھی دو حصوں میں بانٹ دیاگیا جس نے آخر کار اس نتیجے تک پہنچایا کہ مسلمان کا دین اوراس کی دنیا دو علیحدہ علیحدہ چیزیں بن گئیں، حالاں کہ یہ بات بالکل غلط ہے۔ حضرت مجدد کے وقت میں بھی وہ تقسیم موجود تھی اس لیے اسی کے پیش نظر انھوں نے وہ باتیں تحریر فرمائی ہیں ۔ حضرت شیخ عبدالحق محدث دہلوی اور حضرت مجدد کے زمانے کی تاریخ اگر آپ پڑھیں تو یہ بات بالکل واضح ہوجائے گی۔ اب سوالات کے مختصر جواب لکھتا ہوں ۔

(۱) آپ نے یہ جو لکھا ہے کہ ’’علوم دنیوی سے علوم شرعیہ کی تحصیل وتائید کس طرح ہوسکتی ہے جب کہ دونوں علوم میں زمین وآسمان کا فرق ہے۔‘‘ یہ محض اس بناپر آپ نے لکھا ہے کہ آپ کے ذہن میں دینی اور دنیوی علوم کی تقسیم رچی بسی ہوئی ہے اور اس بناپر بھی کہ جو نظام تعلیم ہمارے ماحول پرچھایا ہوا ہے اس کے پیش نظر یہ سمجھنا مشکل ہے کہ دنیوی علوم کا دین اور شریعت سے کوئی تعلق ہوسکتا ہے ۔ ویسے اگر آپ تھوڑا غور کریں تو اس ماحول میں بھی یہ بات معلوم ہوسکتی ہے کہ علوم دنیوی سے علوم شرقیہ کی تحصیل کس طرح ہوسکتی ہے؟ مثال کے طورپر آپ علم الحساب کو لے لیں، علم الحساب دنیوی علوم میں شمار کیاجاتا ہے لیکن کیا اس کے بغیر علوم شرعیہ کی تکمیل ہوسکتی ہے؟ میراث کا علم جسے علوم شرعیہ میں ’علم الفرائض‘ کہاجاتاہے، زیادہ تر علم الحساب پرموقوف ہے۔اگر ہم حساب سے ناواقف ہوں تو کسی ایک شخص کی میراث بھی تقسیم نہ کرسکیں ۔ اسی طرح زکوٰۃ جو ارکان اسلام میں داخل ہے، حساب کے بغیر ادا نہیں کی جاسکتی (یہ دو چیزیں محض بطورمثال پیش کی گئیں ہیں ورنہ شریعت میں حساب کی ہرجگہ ضرورت ہے)۔ اب آپ دیکھ لیجیے کہ علم الحساب سے علوم شرعیہ کی تحصیل ہوتی ہے یا نہیں ؟ اب فرض کیجیے کہ ایک شخص علم الحساب محض اس نیت اور اس مقصد سے حاصل کرتا ہے کہ اس سے سودی کاروبار میں سہولت ہوگی اور موجودہ دورکے بینکوں کی ملازمت حاصل ہوسکے گی اسلامی نقطۂ نظر سے اس کے عدم جواز کا فتویٰ دیاجائے گا۔ اوراگر اس کامقصد ان فرائض کو ادا کرنے میں سہولت حاصل کرنا ہے جو اللہ تعالیٰ نے عائد کیے ہیں تو نہ صرف اس کے جواز کا فتویٰ دیاجائے گا بلکہ بقدرضرورت اسے حاصل کرنا ضروری قراردیا جائے گا۔ اب علوم شرعیہ کی تائید کی مثال لیجیے۔ سائنس، جسے مغربی مفکرین نے اپنی خدا بیزاری کی بناپر خالص دنیوی علم بناکر رکھ دیاہے اور جس میں انھوں نے کوشش کی ہے کہ کہیں سے بھی خدا کا تصورداخل نہ ہونے پائے،اگرآج اس علم سے خدا کی عظمت اورکائنات پراس کی حکیمانہ فرماں روائی کے ثبوت پیش کیے جائیں تو یہ علم علوم شرعیہ کا زبردست موئد بن سکتا ہے اوراس وقت بھی متعدد سائنس داں ایسے پائے جاتے ہیں جنھوں نے اس سے خدا کی عظمت وحکمت کا ثبوت بہم پہنچایا ہے۔ امید ہے کہ آپ اس سلسلے میں مجھ سے زیادہ واقفیت رکھتے ہوں گے، آپ خود سوچ سکتے ہیں کہ جس علم کو خالص دنیوی قراردے دیاگیا ہے اگر ذرا سا اس کا رخ موڑدیا تو یہ نہ صرف علوم شرعیہ کا موئد بن جائے گا بلکہ خود ایک شرعی علم قرارپائے جائے گا۔

(۲) حضرت مجدد نے علوم دنیوی کی تحصیل کو مطلقاً ناجائز قرارنہیں دیاہے۔آپ ان کی عبارتیں پھر پڑھیں، وہ اس کو امر مباح قراردیتے ہیں اوراس کے اشتغال کو اس وقت ناجائز کہتے ہیں جب تمام کوششیں صرف انھیں علوم کو حاصل کرنے میں لگادی جائیں اورعلوم شرعیہ کو نظر انداز کردیا جائے۔ یہی بات ہے جسے میں نے اپنے نوٹ میں واضح کیاہے۔ مجھے کسی ایسے عالم دین کا پتہ نہیں ہے جو یہ کہتا ہو کہ علوم شرعیہ کو نظر انداز کرکے صرف دنیوی علوم کی تحصیل میں اپنی تمام کوششیں صرف کردینا جائز ہے۔

(۳) آپ کا یہ سوال گنجلک ہے۔ صاف سمجھ میں نہیں آیا کہ آپ کہنا کیا چاہتے ہیں ؟ علوم دنیوی کی تحصیل کوئی تحریک نہیں ہے۔ ایسے علوم جن کی شریعت میں مخالفت نہ کردی گئی ہو(مثلاً سحروساحری) ہمیشہ مباح سمجھے گئے ہیں، کبھی کسی نے ان کو مطلق ناجائز نہیں کہاہے۔

(۴) اس کا بھی جواب نمبر (۳) میں آگیا ہے، ان علوم کی تحصیل اس حد تک جائز ہے کہ ایک مسلمان، مسلمان باقی رہے، ایسا نہ ہوکہ وہ دین سے بے نیاز وبے پروا ہوجائے۔ اگر کوئی علم کسی مسلمان کو دین سے بے نیاز وبے پروا کرتا ہے تواس کی تحصیل کا جواز کتاب وسنت سے ثابت نہیں ہے۔

(مارچ۱۹۵۶ء ج۱۶ش۱)