آیۃ الکرسی اور دیگر دُعاؤوں کی تاثیر

آیت الکرسی کے جو اثرات احادیث میں بیان کیے گئے ہیں ، نیزبِسْمِ اللّٰہِ الَّذِی لَا یَضُرُّ مَعَ اسْمِہٖ شَیْئٌکی جو تاثیر بیان کی گئی ہے، یہ محض الفاظ کو زبان سے گزار دینے کے نتائج نہیں ہیں ، بلکہ ان چیزوں کو سوچ سمجھ کر جو شخص پڑھے اور ان کے معانی کو اپنے طرز فکر اور کردار میں جذب کرلے، اس کے حق میں فی الواقع ان چیزوں کے وہی اثرات مرتب ہوتے ہیں جو بیان کیے گئے ہیں ۔ اس کا یہ مطلب نہ سمجھ لیجیے کہ جو شخص ان چیزوں کو پڑھے گا وہ آفات سے اور ان کے طبعی نتائج سے لازماً محفوظ ہوجائے گا، بلکہ اس کا صحیح مطلب یہ ہے کہ اس شخص کے اندر اتنی زبردست قوت پیدا ہوجائے گی کہ کسی صورتِ حال میں بھی اس کا نفس شکست خوردہ نہ ہوسکے گا۔ حوادثِ طبیعی تو ہر انسان کو پیش آتے ہیں ۔ مگر کمزور طبیعت کا انسان ان سے مات کھا جاتا ہے اور مضبوط عزم و ارادے کا انسان ان سے مغلوب نہیں ہوتا۔