نماز وتر کے بعد دوسجدے بے اصل ہیں

خواجہ محمد معصوم سرہندی رحمۃ اللہ علیہ نے مکتوبات میں ایک شخص کے سوال کے جواب میں فرمایا ہے کہ وتر کے بعد سجدہ نہ ان کا عمل ہے اور نہ حضرت مجدد کا عمل تھا۔ انھوں نے مزید لکھا ہے کہ سنن الہدیٰ میں ہے کہ صلوٰۃ الوتر کے بعد دوسجدے جو آیۃ الکرسی پڑھ کر بلاد ہند میں رائج ہیں ان کی کوئی اصل اخباروآثار میں نہیں ہے۔ اور شافعیہ اس کی حرمت کے قائل ہیں۔  میں مکتوب کا ترجمہ یہاں نقل کرتاہوں۔  مکتوب (۴۲) محمد کاشف کے نام۔  بعدالحمدوالصلوٰۃ وتبلیغ الدعوات تم نے دوسرا استفسار یہ کیا تھا کہ وتروں کے بعد سجدہ درست ہے یا نہیں ؟ فقیرنے اس سوال کا جواب اس سے پہلے بھیج دیاتھا۔ تعجب ہے کہ وہ جواب نہیں پہنچا۔جواب کا خلاصہ یہ ہے کہ یہ ہمارا عمل اور ہمارے حضرت (حضرت مجدد رحمۃ اللہ علیہ ) کا عمل نہیں ہے۔علماء نے اس کومنع کیا ہے، نہیں کرنا چاہیے۔ کتاب سنن الہدیٰ میں ہے صلوٰۃ الوتر کے بعد دوسجدے جو آیۃ الکرسی پڑھ کر بلادہند میں رائج ہیں ان کی کوئی اصل اخبار وآثار سے نہیں ہے بلکہ شافعیہ اس کی حرمت کے قائل ہیں اور اکثر حنفیہ اس کو بالکل جانتے تک نہیں ہیں۔  میں نے فقہائے مدینہ سے ان دوسجدوں کے متعلق دریافت کیا۔ انھوں نے بھی اس میں کراہت نقل کی ہے۔

         (مکتوبات خواجہ محمد معصوم سرہندی۔ تلخیص وترجمہ مولانا نسیم احمد امروہوی)

سوال یہ ہے کہ دوسجدے سے مراد دورکعت نماز نفل ہے جو وترکے بعد ہم لوگ پڑھتے ہیں، مگر اس سے پہلے آیت الکرسی نہیں پڑھتے ہیں یا پھر ان سے مطلقاً دوسجدے ہی مراد ہیں جو ہم لوگوں کی نظر سے اب تک نہیں گزرے؟