نکاح میں نام کی غلطی

 اگر نکاح کے وقت لڑکی کانام غلط لیاگیا ہے تو اس کی دو صورتیں ہیں۔ اگر اس طرح کہاگیا ہوکہ فلاں شخص کی بڑی لڑکی کلیمہ کانکاح تم سے کردیا اور آپ نے قبول کرلیا تو کسی لڑکی سے بھی نکاح نہیں ہوا۔ کیوں کہ بڑی لڑکی کلیمہ نہیں بلکہ سلیمہ ہے اور اگر بڑی کا لفظ نہیں کہاگیا ہے بلکہ جیسا کہ آپ کے خط سے اندازہ ہوتا ہے صرف یہ کہاگیا ہے کہ فلاں شخص کی لڑکی کلیمہ کا نکاح تم سے کردیا اور آپ نے قبول بھی کرلیا ہے، تو کلیمہ کا نکاح آپ کے ساتھ ہوگیا۔ اس میں نیت اور ارادے کا اعتبار نہ ہوگا۔ جو نام نکاح کے وقت لیاگیاہے، نکاح اسی لڑکی سے منعقد ہوگا۔ سلیمہ کے بجائے آپ کی بیوی کلیمہ ہوگئی ہیں۔ اگر خلوت صحیحہ نہیں ہوئی ہے تو اس سے بچنے کی صورت یہ ہے کہ آپ کلیمہ کو ایک طلاق دے دیں۔ خلوت صحیحہ سے پہلے جو طلاق دی جاتی ہے اس میں عورت کو عدت گزارنا نہیں ہوتا۔ اس لیے طلاق دینے کے فوراً بعد آپ سلیمہ سے نکاح کرسکتے ہیں۔ سلیمہ سے نکاح اس وقت تک صحیح نہیں ہوگا جب تک آپ کلیمہ کو طلاق نہ دے دیں، اس لیے کہ اس سے آپ کا نکاح منعقد ہوچکا ہے۔

(اگست ۱۹۶۷ء ج۳۹ ش ۲)